-—-2011 I – —–2012 II -—-—2013 III
—————————————————————
—–2014 IV —-—2015 V —-—2016 VI
——————————————————————–
—–2017 VII ———2018 VIII ———2019 IX
—————————————————————-
-——2020 X ————-2021 XI ————2022 XII
—————————————————–
-———2023 XIII ————————————–2024 XIV
—————————————————————
S’Ave Maria Sarda
de Gigi Sotgiu
In Sardigna tenimos una tradissione manna de religiosidade populare chi agattamos in medas manifestatziones de devossione: Rosarios, Gosos e Goccius, cantigos de Cunfrarias po sa Chida Santa. Su cantigu massimamente prus connottu este cussu chi cuminzat cun sas paraulas “Deus ti salvet Maria, chi ses de gratzias piena”, chi s’este ispaniadu meda finzas a fora de sa devossione religiosa e a fora de sa Sardigna. Custa cantone est diventada unu simbulu de identidade sarda ed est connotta comente S’Ave Maria Sarda. Su Coro de Casteddu, chi hat organizzau custu attobiu, bo la cherede faghere connoschere menzus.
Sas paraulas de su Deus ti salvet Maria las attobiamos po sa primma borta a sa fine de su seculu 1600, iscrittas in italianu da unu Gesuita, forzis Padre Innocenzi, cun su titulu “Ave Maria”. Sos padres Gesuitas aian ammaniadu sas Missiones populares, ghiraian tottu sa Sardigna pro s’evangelizatzione e impittaian fintzas sos catechismos in versos. Su primmu testu chi cumparidi in limba sarda est sa bortadura de s’Ave Maria de sos Gesuitas in sardu logudoresu e l’agattamos a intro de su Rosariu de San Vero Milis de su 1731; da cussu momentu tottu sas Cunfrarias hant cumintzau a lu impittare. No ischimos chie at fattu sa bortadura in sardu ma sos missionarios hant ispaniadu custu cantigu in tottu sas partes de sa Sardigna. In sos annos intro sa fine de su 1700 e su cumintzu de su 1800 sunt bessidas duas bortadas in sardu campidanesu in Casteddu e in Quartu Sant’Aleni. Su Deus ti salvet Maria assimizzaiada meda a sas Laudes ispirituales, chi fuint iscrittas cun limbazzu semprice e fazile a intonare.
Po tottu su 1800 e su cumintzu de su 1900 tenimos provas iscrittas chi su Deus ti Salvet fuit connottu e cantadu in totta sa Sardigna ma no ischimos nudda de comente su cantigu beniada intonau e ancora prus pagu de comente fuit iscritta sa musica. Una furriada manna benit in su 1927 cando in Cuglieri benit apertu su Seminariu regionale cun sa Facultade Teologica inue, sos zovanos chi arribaian dae totta sa Sardigna, benian istruidos po diventare predis. Su Gesuita piemontesu Paolo Gamba hat insegnau musica in su Seminariu e fattu su Direttore de sa Schola Cantorum, s’iscola de sos cantores, dae su 1958 a su1970 e hat fattu chircas importantes subra de sa musica religiosa de tradissione sarda. Padre Gamba, cando ch’este torrau in continente, c’hat pigau tottu cussos documentos e sos ultimos annos de vida, los hat passados ind’unu collegiu in Cuneo. Custu archiviu, de importu mannu po sos istudiosos, chi fuit in Cuneo, appustis de azzumai 50 annos, est torrau in Sardigna gratzias a s’impignu de duos cuglieridanos chi aiana muntenniu s’amistade cun Padre Gamba e sunu andaos apposta a Cuneo a lu chircare.
In mesu a sos documentos de padre Gamba bi fuit puru una cartolina, fatta in su Seminariu de Cuglieri in su 1930, inue bi sunu totucantas sas paraulas de Deus ti Salvet Maria cun sa definissione “Su cantu de S’Ave Maria in sardu”. Imparis a sas paraulas b’hat puru unu ispartiu musicale po coro a tres boghes. Cherzo ammentare chi po sa prima borta agattamos iscritta una melodia de su cantigu Deus ti Salvet Maria. Cussa melodia, naschida in su seminariu de Cuglieri, da assora si imponet subra atteras chi esistiana in Sardigna e divèntada a sa fine su modellu unicu chi finzas oe este connoschiu e impreau da chie la cantada.
Custu cantigu, partidu dae su Seminariu de Cuglieri, po mesu de sos seminaristas este arribadu finzas a sas biddigheddas prus isperdias, a sas parrocchias, sas cunfrarias e sas associaziones cattolicas. Sos predis, bene formados a sa musica in Cuglieri, dae su 1930 a innantis ant diffundiu medas cantones e, in cussos annos, sunu naschidos finzas medas coros polifonicos.
Dae assora su Deus ti Salvet incuminzada a essere cantau dae cantores a battoro boghes (a cuncordu, a tenore, a tragiu e ateros) comente cantu de devossione ma fintzas in ateros momentos de disvagu; cun su tempus incuminzana a bessire discos e musicassettas e custu cantigu est diventadu unu simbulu de identidade sarda. In su 1950 in Nugòro cuminzana a naschere coros de boghes de omines, custu modu de cantare appustis benidi nomenadu “iscola nugoresa” de cantu. Su primmu coro nugoresu cantaiada su Deus ti Salvet Maria cun sa musica a battoro boghes ammaniada dae Banneddu Ruju. Toccada a ammentare puru chi, in cussos annos, in Nugòro si cantaiada una vortada de brulla, “Sa fide la professo”, prus connotta comente Tzia Tatana, unu innu a sos piagheres de su binu iscritta da Mastru Predischedda subra de sa melodia de Deus ti Salvet Maria. De assora a oe non b’hat coro in Sardigna, sian omines o feminas, chi non cantet custa cantone.
A dies de oe s’Ave Maria sarda este bistada cantada dae sos artistas sardos prus mannos, donzunu a modu sou. Sa primma a la cantare este bistada Maria Carta chi, in su 1971, l’hat cantada accumpanzada da unu mastru de organu; Andrea Parodi, in su 1986 l’hat cantada cun unu coro tattaresu. In su 1971 Elena Ledda l’hat cantada accumpanzada dae sa trumba de Paolo Fresu; Clara Murtas, in su 2002, l’hat cantada cun s’orchestra de su Mastru Ennio Morricone. Finzas Fabrizio de André hat creffiu cantare s’Ave Maria sarda, a modu sou.
Marco Lutzu, unu istudiosu de musica sarda de s’universidade de Casteddu, cun ateros istudiosos, a custu cantigu hat impreau unu libru intreu, pubbricau in su 2020.
Casteddu, 14 de su mese de Nadale
(Gigi Sotgiu)
—————————————————-
AService Studio