Candidau istimau, Candidau a Presidente de sa Regione nostra.
Candidau istimau, Candidau a Presidente de sa Regione nostra,
di Michele Podda,
a perdonare si ti dao istrobbu in custa casione de impinnu e contipizu, ma narrer ti lu depo. SA LIMBA SARDA, de custu ti cheria dimandare a facher carchi cosa, da chi tue podes esser, cando a deghe dies, su chi at aer in possa su Guvernu de totu sos Sardos.
M’as a narrer chi jai bi nd’at aer ateru de pessare, si no a sa limba: zovanos chene triballu e ateros fuindesinde; zente manna chi totu in d-unu s’azzapan chene triballu e chene pensione tenende puru familiedda; operas chene dissinias e ateras chene mancu comizzadas; biddas intreas isparindesiche dassande domos boidas carrigas de amentos e de istoria; e tando su pastoriu, cussa zenia de Sardos chi semus totus, ca tue puru che a mie ses naschidu dae sa erbeghe, e bi ses creschiu e fatu a mannu, ca sa Sardinna est da issa chi s’est mantesa semper libera, binta o binchidora chi esseret.
Zustu tando, pessa prima a su pastoriu, a totu sos Sardos chi sun in apretu; ma chene dassare cussu, dae una betada ‘e ocru puru a sa limba sarda, ca cussa puru est che a sa erbeghe etotu, ca nos at pesau dae minores totu cantos, ca cussa fit sa limba de mamas nostras, e de babbos, jajos e jajas, mannois e babbais, e de totu sos mannos de milli e mill’annos. Si tue cumandas, ater podet facher s’ordiminzu, su dovere chi tocat po non che la dassare morrer, ca jai l’ischis chi est dae tempus meda chi non campat e nen morit, continu a filipende. Tue cumanda, dae s’ordine chi dae ocannu, DERETU in su mese ‘e capidanni, in donzi iscola de Sardinna bi siat unu argumentu novu: LIMBA SARDA. Totu cantos, dae sa materna a sas iscolas artas, sos pizzinnos minores o mannitos chi sian, TOTUS ISTUDIEN DE OBBRIGU SA LIMBA SARDA.
M’as a narrer chi non solu sos Sardos ma puru sa limba nois la tenimus a trabessu, cumente sas chentu concas … NO EST ABBERU, tenimus una limba solu, mantesa in donzi bidda, cadiuna cun su colore suo ma semper sa matessi, ca semper sos sardos l’an chistionà e si cumprendian a pare unu cun s’ateru, in Capu ‘e Susu e in Capu ‘e Josso, innubesisiat. E tando non bi nd’at ite irballiare: in s’iscola s’imparat SA LIMBA DE MAMA, cumente faghen in totu su mundu. Apusti de annos si podet mezorare, currezire, cambiare carchi cosa, ma si non si comizzat non si faghet nudda, e sa limba si ch’andat.
M’as a torrare chi cheret dinare meda, chi sos de Roma no l’aprobban e chi cheret mastros novos chi si depen istruire issos puru …NO EST ABBERU, nd’agatas cantu nde cheres, in donzi bidda, in s’iscola etotu, in sas familias de sos pizzinnos; nd’agatas mannos e bonos, cumente li ruet. Si tenes bolontade prova, arriscu de dannos non bi nd’at; como lu podes promiter, tando apustis intrau a Presidente lu faghes e as a bier chi totus, TOTU SOS SARDOS po custu t’an a torrare grassias, como etotu e semper, ca custa cosa, amentatilu, at a abbarrare in s’istoria de Sardinna.
Pro unu cussizu ti doe custu libritu “Su sardu totunu” iscritu cun sa mente ma galu prus cun su coro; ma si b’at bisonzu deo puru, e ateros mille istudiaos e capassos, semus a cumandu tuo po dare una manu ‘e azudu.
E tando promiti e mantene, e pone in parte puru sos ateros Candidaos a Presidente, ca PARIS SI FAGHET PRUS E MENZUS, po sa Sardinna.
AService Studio
[…] Candidaos Presidentes, subra sa netzessidade de introduire in totu sas iscolas sa Limba sarda. . Candidau istimau, Candidau a Presidente de sa Regione nostra, di Michele Podda. […]